سياسة الخصوصية — Tech Valley (Apex ERP)
الصفحة دي بتشرح البيانات اللي بنجمعها من الموقع ومن نموذج التجربة المجانية لنظام أبيكس (Apex ERP)، وبنعمل بيها إيه. المسؤول عن البيانات دي: Tech Valley. أما البيانات اللي بتدخّلها جوه النظام نفسه (أصنافك وعملاءك وفواتيرك) فهي ملكك، وبتحكمها اتفاقية الاستخدام والترخيص.
١. البيانات اللي بنجمعها لما تسجّل للتجربة
- اسمك، واسم المحل أو الشركة، وإيميلك، ورقم موبايلك.
- كلمة السر — بتتحفظ مشفّرة (مش نص مقروء)، ومحدش يقدر يشوفها ولا إحنا.
- عنوان الإنترنت (IP) ونوع المتصفح وقت التسجيل.
- كود التحقق اللي بنبعته على إيميلك — صالح 30 دقيقة بس.
٢. بنستخدمها في إيه
- نجهّز نظام التجربة باسمك ونبعتلك كود التحقق.
- نمنع إساءة الاستخدام: عدد محدود من التسجيلات لكل عنوان إنترنت في اليوم، وتسجيل واحد لكل رقم موبايل.
- نتواصل معاك بخصوص تجربتك أو اشتراكك.
٣. بنحفظها فين ولحد إمتى
- في قاعدة بيانات على خوادم الخدمة.
- لو ما أكدتش إيميلك خلال 72 ساعة، طلب التجربة بيتقفل — والبيانات بتفضل محفوظة عشان نقدر نتواصل معاك.
- التجربة: 7 أيام، وبعد التجربة الدخول بيتوقف وبياناتك بتفضل محفوظة، ولما تشترك تختار: تكمّل بنفس بياناتك أو تبدأ من جديد.
- بعد انتهاء الاشتراك المدفوع: تقدر خلال 15 يوم من تاريخ الإيقاف تطلب تصدير بياناتك عن طريق الدعم الفني وفق البند (13-2) من اتفاقية الاستخدام، ويحق لنا بعد انقضاء المدة دي حذفها نهائيًا.
- تقدر تطلب نسخة من بيانات تسجيلك أو حذفها عن طريق الدعم الفني (البيانات تحت).
٤. مين بيوصله إيه
- ما بنبيعش بياناتك ولا بنشاركها مع حد لأغراض إعلانية.
- مزوّد خدمة البريد: رسالة كود التحقق بتتبعت عن طريق خادم بريد عند مستضيف البريد بتاعنا (HostGator)، فإيميلك واسمك بيعدّوا عليه عشان الرسالة توصلك.
- خطوط Google: صفحات الموقع بتحمّل الخط من Google Fonts، فمتصفحك بيكلّم خوادم Google مباشرة وده بيظهرلهم عنوان الإنترنت بتاعك.
- Google Play: لو ضغطت رابط تنزيل التطبيق، هتروح لصفحة Google Play وتسري عليها سياسة Google.
٥. أداة قياس الإعلانات من Meta
أداة قياس الإعلانات من Meta (Meta Pixel) شغّالة دلوقتي على صفحات الموقع وصفحة التسجيل للتجربة. بنبعت لـMeta (فيسبوك وإنستجرام) إن حد زار الصفحة، وإن حد سجّل للتجربة أو بدأها أو ضغط زرار تنزيل التطبيق أو زرار اتصال أو واتساب أو بريد — مع قيمة تقديرية بالجنيه للتسجيل. مش بنبعت إيميلك ولا رقم موبايلك ولا اسمك ولا كلمة السر. الغرض: نقيس نتايج إعلاناتنا ونحسّنها. ولو مش عايز ده: تقدر تمنعه من إعدادات الخصوصية في متصفحك، أو بحاجب إعلانات، أو من إعدادات الإعلانات في حسابك على فيسبوك/إنستجرام (Meta).
٦. اللي بيتحفظ على جهازك
- اختيارك في شريط الخصوصية (قبول أو رفض) بيتحفظ في متصفحك.
- مصدر الزيارة (لو جيت من إعلان) بيتحفظ مؤقتًا في نفس التبويب، وبيتمسح لما تقفله.
٧. تتواصل معانا إزاي
عن طريق الدعم الفني: 01501229999 (اتصال · واتساب) أو info@quicksale-eg.com — لأي سؤال، أو لطلب نسخة من بياناتك أو حذفها.
اقرأ كمان: سياسة الإلغاء والاسترداد